Localizan e recuperan o cadáver do mergullador desaparecido no Grove
Localizan e recuperan o cadáver do mergullador desaparecido no Grove
Sobre as 11:30 horas, mergulladores dos GEAS atoparon o corpo do home desaparecido, que estaba somerxido e "enganchado" a algo, "preto" de onde desaparecera
Efectivos do Grupo Especial de Actividades Subacuáticas da Garda Civil localizaron somerxido na mañá deste venres o corpo do mergullador desaparecido desde o luns na zona do Grove e veciño de Vilagarcía de Arousa.
Así o confirmaron fontes do Instituto Armado, que detallaron que sobre as 11:30 horas mergulladores dos GEAS atoparon o corpo do home desaparecido, duns 44 anos de idade, que estaba mergullado e "enganchado" a algo, "preto" de onde desaparecera.
Un capitán da Garda Civil que seguiu desde as rochas o traballo dos GEAS conta que foi bastante difícil sacalo da auga polas condicións do terreo e di que sospeitan que puidera estar enganchado "por algunha extremidade".
Segundo sinalaba o capitán da Garda Civil, todo apunta a que o falecido, que vivía só en Vilagarcía, levaba na auga desde o luns en que deixou aquí o seu coche para practicar pesca submarina. Onte, xoves, ao veren o vehículo aparcado, púxose en marcha a busca na zona.
O capitán da Garda Civil fala de circuntancias que rodearon as pescudas neste caso a partir dunha serie de sospeitas e averiguacións.
Tras ser recuperado o corpo foi levado a terra á espera de que a autoridade xudicial ordenase o levantamento do cadáver para o seu traslado. O corpo foi recuperado tras comezar na tarde deste pasado xoves un operativo de procura, coordinado pola Garda Civil, para localizar a este mergullador veciño de Vilargacía de Arousa, cuxo vehículo permanecía estacionado na zona de San Vicente desde o luns.