Juan Gestal avoga por un dobre control de covid aos viaxeiros procedentes da China
O profesor emérito de Medicina Preventiva da USC cre que, se non xorden novas variantes do virus nos próximos meses, a OMS anunciará a fin da pandemia antes do verán
A partir de hoxe, os viaxeiros que cheguen a España desde A China terán que presentar unha proba negativa ou o certificado de vacinación. O Consello de Colexios Médicos avoga por un dobre control, ao igual que o profesor emérito de Medicina Preventiva da USC Juan Gestal: "Son partidario de que para saír da China tivesen que ter unha PCR negativa e ao chegar aquí lles fixeran un test de antíxenos. E, aos que desen positivo, facerlles a PCR".
Gestal apunta que esa sería tamén unha forma de secuenciar o virus chinés para controlar se xorde unha nova variante, dado que A China, di, ten unha política informativa pouco transparente.
Nunha entrevista na Radio Galega, Gestal atribuíu a onda de infeccións na China a tres factores: a escasa porcentaxe de vacinación, a menor efectividade da súa vacina e a política de illamento que impediu a circulación do virus e a conseguinte inmunización social.
En España, di Gestal, temos un nivel de inmunización alto, polo que non ve necesario que os menores de 60 anos poñan a cuarta dose da vacina, salvo que pertenzan a colectivos vulnerables.
O profesor de Medicina Preventiva cre que estamos ante os últimos momentos da pandemia, sempre que non xorda na China unha nova variante. Se iso non sucede, cre que a OMS anunciará a fin da pandemia "na primavera".
