Juan Gauto quere entrar no grupo de arxentinos que "fixeron historia" no Deportivo

Esta mañá o Deportivo presentou a Juan Gauto, a súa última incorporación.

"En canto estivo o interese, non o dubidei, tamén polo ano difícil que tiven en Suíza, tamén polo club, que os arxentinos son moi queridos acá. Estou moi feliz e espero estar entre eses arxentinos", afirmou.

Varios futbolistas arxentinos puxeron o seu nome con letras de ouro nas páxinas do conxunto deportivista. Un dos máis importantes, o actual seleccionador da Arxentina, Lionel Scaloni, quen se gañou á afección branquiazul durante a súa etapa na Coruña e quen foi un dos motivos que levaron a este extremo de 20 anos a fichar polo cadro herculino.

"Unha persoa importante hoxe en día na selección arxentina como Scaloni, un señor moi querido, estou moi feliz de estar acá e espero estar entre eses arxentinos na historia do club", dixo.

Gauto chega ao Dépor cedido polo Basilea, con opción de compra. En Suíza disputou 22 partidos a pasada tempada, aínda que só completou dúas.

Confesou que lle gusta "moito o un contra un, picar ao espazo, terminar as xogadas e tratar de axudar ao equipo no lugar que me toque".