Jordan Howard: “Estou preparado para darlle á cidade e ao equipo todo o que teño”
Para Howard, a ACB é coñecida como a "mellor liga de Europa"
O Monbus Obradoiro presentou ao último das fichaxes en chegar a Santiago de Compostela. Jordan Howard, escolta norteamericano pero internacional por Porto Rico, pronunciou as súas primeiras palabras como obradoirista nas instalacións de Deportes Caneda, tenda oficial do club.
O xogador recibiu a benvida de parte de Óscar Rodríguez, membro do Consello de Administración do club:
“Gañamos a Copa Galicia sen el, así que esperamos que coa súa participación o equipo dea un salto de calidade. É un escolta con experiencia profesional en Italia e Francia, que vén de xogar coa súa selección o Mundial. Na súa posición daranos versatilidade e puntos, que é o que buscamos”.
O escolta norteamericano mostrouse “encantado e agradecido de estar en Santiago. É unha cidade fermosa”.
“Estou nun club importante. Atopei un grande adestrador e un magnífico equipo. Estou preparado para darlle á cidade e ao equipo todo o que teño”, engadiu.
Howard amosou a súa alegría por chegar á liga Endesa:
“Xoguei en varios países, en Francia e Italia, pero a ACB é coñecida como a mellor liga de Europa. Estou encantado de estar na mellor liga. O meu irmán contoume o dura que é, pero estou preparado”.
