Jonathan Andic pide volver declarar no xulgado tras estudar a acusación do homicidio do pai
O auto de prisión mantén que houbo "planificación" na morte do fundador de Mango e destaca que a autopsia descarta un esvarón
A defensa insiste en que foi un accidente e que a suposta mala relación entre pai e fillo se basea en mensaxes de hai anos
Na súa comparecencia deste martes nos xulgados de Martorell, Jonathan Andic respondeu só as preguntas dos seus avogados. Pero xa lle solicitou á xuíza poder volver declarar e aceptar tamén as preguntas da acusación unha vez que teña estudada a causa que o considera responsable da morte de seu pai, o fundador da empresa téxtil Mango.
No auto no que se basea a orde de prisión baixo fianza para Andic, a xuíza mantén que existe un "cúmulo de indicios" que avalan que tivo unha "participación activa e premeditada" no homicidio de seu pai.
Recalca a "planificación e o estudo previo" que fixo do lugar dos feitos, no que estivo ata tres veces a semana antes de que Isak Andic falecese ao precipitarse por un desnivel duns 150 metros na serra de Monserrat en decembro de 2024. A xuíza suliña que os resultados da autopsia "descartan practicamente" que a caída fose produto dun "esvarón ou tropezo".
Isak Andic, o fundador de Mango, faleceu en decembro de 2024
A defensa de Jonathan Andic, liderada polo avogado Cristóbal Martell, intentará, pola contra, rebater con informes periciais que as pegadas recollidas son compatibles cun accidente. Considera ademais a defensa que as contradicións das súas primeiras declaracións se deben á conmoción do momento e que as mensaxes que evidencian as desavinzas entre pai e fillo son de hai anos, mesmo en 2018.
De acordo coa lei, é á xuíza a quen lle corresponde decidir se considera pertinente ou non aceptar a petición de Jonathan Andic para volver declarar sobre esas cuestións antes do xuízo. Agora está en liberdade provisional, tras pagar unha fianza dun millón de euros.
.png)
