Jennifer Hermoso e AFE recorren a sentenza contra Luis Rubiales

Jennifer Hermoso, internacional da selección española, e a Asociación de Futbolistas Españois (AFE) recorrerán a sentenza do xuíz do Penal da Audiencia Nacional, José Manuel Fernández-Prieto, contra o expresidente da RFEF, Luis Rubiales.

A axencia de representación da futbolista, que milita nas filas do Tigres mexicano, e a acusación popular exercida polo sindicato de futbolistas españois confirmaron a EFE a súa decisión de recorrer a condena por agresión sexual ditada contra Rubiales, polo bico non consentido que deu á xogadora na entrega de medallas do Mundial que España gañou en Australia en 2023, unha posibilidade que tamén estuda a Fiscalía.

Rubiales, que tamén confirmou que recorrerá a sentenza, foi condenado este xoves a 18 meses de multa cunha cota de 20 euros diarios (uns 10.800 euros en total) por un delito de agresión sexual polo bico na boca á xogadora Jennifer Hermoso tras gañar o Mundial en Sydney, o 20 de agosto de 2023.

O ditame prohíbelle ademais a Rubiales achegarse a Hermoso nun radio de 200 metros e comunicarse con ela durante un ano. Tanto Rubiales como o exadestrador da selección feminina Jorge Vilda e os exaltos cargos Albert Luque e Rubén Rivera, que sentaron con el no banco en relación a estes feitos foron absoltos do delito de coaccións á xogadora Jenni Hermoso do que estaban acusados para que restase importancia ao bico non consentido que lle deu o primeiro tras a final do Mundial.