Israel prohibe ao consulado de España en Xerusalén atender os palestinos en Cisxordania
Israel prohibe ao consulado de España en Xerusalén atender os palestinos en Cisxordania
O ministro de Exteriores español protestará ante o Goberno israelí por esta decisión e nega que haxa "antisemistas" no Executivo
Nas últimas horas Israel reprendeu a embaixadora española: "É unha declaración que cospe na cara do pobo israelí"
O ministro israelí de Exteriores Israel Katz anunciou este venres que decidiu cortar a conexión entre a embaixada de España en Tel Aviv e os palestinos e prohibir ao consulado español en Xerusalén "prestar servizos aos palestinos".
O motivo desta decisión é o recoñecemento de España do Estado palestino e o "chamamento antisemita" da vicepresidenta do Goberno español Yolanda Díaz, quen pechou esta semana un discurso co slogan propalestino "Desde o río ata o mar".
"En resposta ao recoñecemento do Estado palestino por parte de España e as declaracións antisemitas da vicepresidenta do Goberno non só de recoñecer un Estado palestino senón de liberar Palestina desde o río ata o mar, decidín cortar a conexión entre a representación de España en Israel e os palestinos e prohibir ao Consulado español en Xerusalén dar servizo aos palestinos de Cisxordania", dixo o ministro de Exteriores israelí, Israel Katz, na rede social X.
A mensaxe está publicada en hebreo, inglés e español, e nesta última versión, menciona tanto o presidente Pedro Sánchez coma o líder do Partido Popular Alberto Núnez Feijoo.
Tras el reconocimiento por parte de España de un Estado palestino y el llamado antisemita de la Vicepresidenta del Gobierno español a no conformarse con reconocer un Estado palestino "y liberar Palestina desde el río hasta el mar", he decidido cortar la conexión entre la…
— ישראל כ”ץ Israel Katz (@Israel_katz) May 24, 2024
Así mesmo, subliñou, en referencia a Díaz: "Se esta persoa ignorante e chea de odio quere entender o que busca realmente o islam radical, debería estudar os 700 anos de dominio islámico en Al Ándalus, hoxe España".
O ministro Katz advertiu esta semana que o recoñecemento do Estado palestino por España, Irlanda e Noruega tería "consecuencias graves".
O Goberno español rexeita as críticas e prepara unha protesta
O ministro de Asuntos Exteriores, Unión Europea e Cooperación, José Manuel Albares, adiantou que o Goberno protestará ante o israelí pola decisión de impedir que o Consulado Xeral en Xerusalén atenda aos palestinos de Cisxordania, á vez que negou que no Executivo español haxa "antisemitas".
Nunha entrevista en RAC1, recollida por Europa Press, o ministro indicou que o Executivo vai analizar o anuncio realizado polo ministro de Exteriores israelí, Israel Katz, e "desde logo se iso é unha decisión tal e como se le da literalidade", entón "protestaremos".
Por outra banda, recalcou que "no Goberno de España non hai antisemitas", senón que é "un Goberno tolerante, plural, diverso que non acepta ningún discurso de odio, incluído o antisemitismo".
