Isabel II expresa o seu desexo de que Camilla sexa raíña consorte

Cargando resultados...

Publicador de contidos

A monarca abre a porta á sucesión nunha mensaxe difundida no 70 aniversario da súa chegada ao trono

G24.gal 06/02/2022 11:32

A raíña Isabel II expresou o seu desexo de que a esposa do príncipe Carlos, Camilla, "sexa coñecida como raíña consorte" cando o seu primoxénito se converta en rei, nunha mensaxe difundida polo aniversario este domingo dos seus 70 anos no trono.

Esta é a primeira vez que a soberana, de 95 anos, aclara este punto, pois ata o de agora especulábase con que a segunda esposa do herdeiro ao trono, coa que casou en 2005 estando ambos os divorciados, podería ser só princesa.

Na súa persoal carta á nación co gallo do seu Xubileu de Platino (a primeira monarca británica en cumprilo), que asina como "A súa Servidora", Isabel II abre a porta á sucesión.

Tras agradecerlle á xente de "todas as nacionalidades, credos e idades" do Reino Unido e o resto do mundo "a lealdade e o afecto" que lle amosaron durante o seu reinado, pide que estendan ese apoio a Carlos, de 73 anos, e a Camilla, de 74.

"Cando, na plenitude dos tempos, o meu fillo Carlos se converta en rei, sei que lle darán a el e á súa esposa Camilla o mesmo apoio que me deron a min; e é o meu sincero desexo que, chegado ese momento, Camilla sexa coñecida como raíña consorte, mentres continúa co seu propio servizo leal", escribe Isabel II.

Apoio da familia

A Raíña tamén alude ao "firme apoio" que recibiu da súa familia e, en especial, do seu falecido esposo, o príncipe Filipe, do que di que foi un compañeiro "disposto a desempeñar o papel de consorte e facer de xeito desinteresado os sacrificios que o acompañan".

"É un papel que vin desempeñar á miña propia nai durante o reinado do meu pai", sinala.

Isabel II conta que o aniversario do seu acceso ao trono o 6 de febreiro de 1952 lémbralle tanto o inicio do seu reinado como a morte ese mesmo día do seu pai, Jorge VI, na residencia familiar de Sandringham (leste de Inglaterra), onde a soberana pasa esta xornada.

"Ao conmemorar este aniversario, compráceme renovarlles a promesa que fixen en 1947, de que a miña vida sempre estará dedicada ao seu servizo", manifesta.

Balance e desexos

Tamén recoñece que "hai moito polo que estar agradecidos".

"Estas últimas sete décadas viron un progreso extraordinario a nivel social, tecnolóxico e cultural que nos beneficiou a todos, e confío en que o futuro nos ofrecerá oportunidades similares e especialmente para as xeracións máis novas no Reino Unido e en toda a Commonwealth (mancomunidade de excolonias británicas)", declara.

Do mesmo xeito, expresa o seu desexo de continuar servindo "con todo o meu corazón".

"Agardo que este Xubileu reúna familias e amigos, veciños e comunidades -despois de momentos difíciles para tantos de nós-, para gozar das celebracións e reflexionar sobre os desenvolvementos positivos na nosa vida cotiá que tan felizmente coincidiron co meu reinado", conclúe.

Isabel II pasará este aniversario en privado en Sandrigham á espera de protagonizar celebracións nacionais nun período festivo do 2 ao 5 de xuño.