Irán responde á ofensiva estadounidense con novos ataques sobre Xordania e Bahrein

Irán lanzou este martes novos ataques contra Xordania e Bahrein, sen vítimas mortais confirmadas ata o de agora, en resposta á última ofensiva dos Estados Unidos contra o país persa, que se estendeu cinco horas e alcanzou sistemas de defensa de Teherán.

Segundo a axencia estatal de Xordania, Petra News, Amán interceptou e derrubou catro mísiles que violaran o espazo aéreo xordano desde territorio iraniano a madrugada do martes, cando a Garda Revolucionaria de Irán (IRGC, en inglés) reclamou a autoría dos ataques a países aliados de Washington en Oriente Medio.

Unha fonte militar anónima citada por Petra News asegurou que os equipos xordanos de Defensa se encargaron dos restos dos mísiles en varios puntos, tomando todas as precaucións necesarias para asegurar as zonas e garantir a seguridade pública, sen noticia de persoas afectadas por estes feitos.

Pola súa banda, a axencia iraniana Tasnim, vinculada á IRGC, informou da destrución dun radar de control aéreo que supostamente pertence á quinta flota naval da Armada dos EUA en Bahrein, que alberga bases militares estadounidenses.

"A Garda, mediante un ataque con mísiles e drons contra a quinta flota naval do Gran Satán (Os EUA) en Bahrein, prendeu lume aos depósitos de combustible desa flota e alcanzou e destruíu un radar Patriot e un sistema de radar de alerta temperá", di o comunicado da IRGC citado por Tasnim.

Nas últimas horas, o Ministerio de Interior de Bahrein informou en tres ocasións da activación de sirenas de alarma, coas que piden aos cidadáns dirixirse a lugares seguros, sen que se informase ata o de agora de vítimas mortais.

Na madrugada deste martes, Estados Unidos completou unha nova onda de ataques contra obxectivos militases en Bushehr, Chah Bahar, Jask, Konarak, Abu Musa e Bandar Abbas, segundo confirmou en X o Comando Central estadounidense (CENTCOM).

A operación levouse a cabo empregando municións de precisión contra sistemas de defensa costeira, instalacións de mísiles e drons e capacidades marítimas iranianas, co obxectivo de seguir reducindo a capacidade de Teherán para atacar o transporte marítimo comercial.

O Centcom engadiu que máis de 50.000 militares estadounidenses permanecen despregados en Oriente Medio e asegurou que as forzas dos Estados Unidos continúan vixiantes, letais e preparadas para responder a calquera ameaza na rexión.

A xornada de ataques, a terceira consecutiva, chegou horas despois de que o presidente Donald Trump reactivase o bloqueo naval sobre a República Islámica e asegurase que o país sería golpeado moi duro.