Irán descarta a sinatura do acordo de entendemento cos EUA para este domingo

O portavoz do Ministerio de Exteriores iraniano, Ismail Bagaei, afirmou este sábado que o memorando de entendemento cos Estados Unidos non se vai asinar este domingo, tal e como anunciou Paquistán, país que media entre os dous rivais.

"Debemos esperar a coñecer a data exacta da firma do memorando de entendemento; aínda que non será mañá, non se pode descartar que teña lugar nos próximos días", dixo nunhas declaracións recollidas pola axencia oficial IRNA.

O diplomático salientou que o texto "non é un acordo final" entre Irán e os Estados Unidos senón "un entendemento que esboza o marco xeral da disputa e establece que a guerra vai rematar".

Tamén explicou que a cuestión nuclear queda para máis adiante e discutirase "nun período de 60 días".

Buques no estreito de Ormuz. Amirhosein Khorgooi/ISNA/WANA vía REUTERS

O primeiro ministro paquistaní, Shehbaz Sharif, anunciara a sinatura inminente dun "acordo de paz".

"Estamos máis preto que nunca dun acordo de paz. Coa probable finalización prevista para as próximas 24 horas, Paquistán prepárase para a sinatura electrónica do acordo de paz inmediatamente despois, seguida de conversas técnicas a próxima semana", afirmou en X.

Segundo explicou o ministro de Exteriores iraniano, Abás Araqchí, o acordo conta con dúas partes. A primeira fai referencia á liberación de activos persas bloqueados no estranxeiro, ao levantamento do bloqueo de Ormuz e ao fin das hostilidades en todas as frontes, incluído o Líbano.

A segunda aborda a cuestión nuclear. Malia a aparente inminencia da firma, nas últimas horas a armada iraniana informou dun ataque a un buque que trataba de cruzar o estreito "sen permiso".

Pola súa banda, os Estados Unidos denunciaron o lanzamento de drons por parte de Teherán neste estratéxico paso polo que transitaba o 20% do petróleo mundial antes do conflito.