Investigan o uso irregular de drons para aplicar produtos fitosanitarios en viñedos na Ribeira Sacra

A Garda Civil de Lugo realiza desde o pasado ano unha investigación polo posible uso irregular de drons para aplicar produtos fitosanitarios en viñedos da Ribeira Sacra.

Segundo detallou o instituto armado nun comunicado, a principios de ano recibiron novas información de interese e denuncias relacionadas con este tipo de ilícitos.

Ante estes feitos, coordinaron un servizo conxunto entre o equipo Pegaso e o Eprona da Comandancia de Lugo, contando co apoio do servizo de Sanidade Vexetal da Xunta.

O obxectivo era comprobar a posible utilización de drons para a aplicación aérea de produtos fitosanitarios, actividade prohibida con carácter xeral en Galicia, salvo autorizacións excepcionais.

Así, durante o operativo, os axentes localizaron un dron de grandes dimensións sobrevoando un viñedo mentres realizaba labores de fumigación a baixa altura. Ante isto, desprazáronse ata a zona de aterraxe, procedendo á paralización da actividade e identificación dos responsables da aeronave.

Tamén procederon á recollida de mostras do produto usado, que foron remitidas ao servizo de Sanidade Vexetal para analizalas no laboratorio. Tras diferentes comprobacións constataron que a empresa responsable non tiña, nese momento, a documentación e autorizacións en materia aeronáutica nin de aplicación de produtos fitosanitarios.

Os axentes detectaron numerosas irregularidades administrativas relacionadas coa seguridade aérea e coa normativa de sanidade vexetal e confeccionouse un informe con polo menos 10 denuncias administrativas á espera de que a empresa achegue a documentación que estime oportuna.

A utilización de drons para a aplicación de fitosanitarios está sometida a unha estrita regulación debido aos riscos derivados da dispersión de produtos potencialmente tóxicos e perigosos para a saúde humana, a fauna, o medio ambiente e cultivos lindeiros, especialmente en zonas de produción ecolóxica ou próximas a canles fluviais.

Ademais, neste caso concreto, o risco increméntase ao tratarse dunha aeronave de 90 quilogramos de peso operando nunha zona de intensa actividade agrícola e elevada afluencia turística.

A Garda Civil mantén abertas as actuacións e está á espera dos resultados analíticos das mostras intervidas e da valoración técnica e administrativa por parte dos organismos competentes.