Investigan 22 mortes e mutilacións nun hospital portugués

A Entidade Reguladora da Saúde (ERS) abriu unha investigación ás neglixencias denunciadas no Hospital Fernando Fonseca de Portugal, que inclúen relatos de malas prácticas que supostamente deixaron polo menos 22 mortos ou mutilados.

Os casos remóntanse a outubro e novembro de 2022 e o Colexio de Médicos luso foi informado hai un mes.
Na súa carta a esta institución, un dos denunciantes relatou situacións que inclúen "mortalidade e mutilacións innecesarias, evitables, resultado dunha atención ao paciente que non coincide coa legis artis (procedementos profesionais)".
Ademais, asegurou que non foi provocado por un médico en concreto, senón por "unha situación sistémica" e que é necesario "cuestionar e reformular" a estratexia ao tratar os pacientes para evitar mortes.
Aclarou que, sumados aos 22 casos máis graves, houbo "moitos outros" que non foron tratados adecuadamente, aínda que de menor gravidade, "'perdidos' no servizo (de Cirurxía Xeral), avaliados por médicos novos, voluntariosos pero sen experiencia que, aínda que están a dar o mellor de si, pouco ou nada son corrixidos ou orientados".

Os relatos inclúen casos como un paciente duns 60 anos ao que lle interviñeron do bazo sen ter instrucións para unha cirurxía programada e que morreu "desangrado, con preto de 15 transfusións", e outra persoa que foi intervida do páncreas por sospeitas dun tumor que non existía.
Súmanse varios pacientes oncolóxicos operados que non tiñan cancro e menciónase o caso dun "que recibiu radioterapia e non tiña tumor". 
O Hospital Fernando Fonseca informou este venres de que o seu Consello de Administración recibiu unha primeira denuncia en outubro sobre "supostos indicios de malas prácticas" e abriu un "proceso de investigación" para determinar os feitos.