Investigado un veciño de Pontevedra por tráfico de tallas de marfil de animais protexidos

A Garda Civil de Ourense tomoulle declaración a un veciño de Pontevedra investigado como presunto autor dun delito contra a fauna por tráfico de tallas de marfil. Concretamente, as tallas intervidas son de elefante, cachalote, candorca e hipopótamo, segundo o Ministerio de Transición Ecolóxica.

Trátanse de animais incluídos no convenio Cites (regulador da prevención do movemento transfronteirizo de especies en perigo de extinción e o tráfico doutras especies de animais e plantas silvestres). Teñen un grao de protección "estritamente protexido" e requiren documentación expedida polos organismos competentes que acrediten a súa orixe legal.

Segundo informa a Garda Civil, nesta operación, chamada Cinquecento, comisáronse 66 pezas de marfil suxeitas á regulación do convenio, que carecen de documentación que acredite a súa legal tenza.

As investigacións iniciáronse en setembro de 2022 tras localizar nun domicilio de Pontevedra varias tallas, das que se non se acreditaba a procedencia. O valor económico destas pezas está taxado en 32.000 euros.