A Xunta amplía a alerta vermella por calor a 158 concellos

A Xunta ampliou para este sábado a alerta vermella por calor a 158 concellos, no marco do Plan actuacións da Comunidade fronte a posibles efectos das altas temperaturas sobre a saúde, segundo os datos enviados este venres por MeteoSalud.

En concreto, para esta xornada actívase o nivel 3, vermello, en zonas isoclimáticas do noroeste e interior da Coruña; centro, montaña e sur de Lugo; interior de Pontevedra e montaña de Ourense.

O nivel 2, laranxa, afectará as zonas isoclimáticas suroeste da Coruña, Miño de Ourense, litoral de Pontevedra ou Rías Baixas e Miño de Pontevedra. Doutra banda, o nivel 1, amarelo, activarase nas zonas isoclimáticas oeste da Coruña, noroeste de Ourense e Valdeorras.

A previsión é que a situación de altas temperaturas se manteña en toda Galicia, polo que as alertas permanecerán activas por posibles efectos adversos para a saúde durante varios días.

Consulta os 158 concellos afectados pola alerta vermella

Así mesmo, no caso do deporte, a Xunta, a través da Secretaría Xeral para o Deporte, determinou a suspensión da actividade deportiva federada no exterior nas zonas afectadas pola alerta vermella.

Por outra banda, nas zonas con alerta laranxa por calor non se suspende a actividade deportiva federada, pero recoméndase adaptar os horarios de práctica ás condicións específicas de cada zona, evitando, na medida do posible, as horas de maior calor e adoptando as medidas preventivas necesarias para minimizar o impacto das altas temperaturas.