Evacúan en helicóptero un home que rescataron inconsciente do mar en Cangas

Un home foi evacuado en helicóptero ao hospital despois de ser rescatado da auga en Cangas en estado inconsciente. Segundo informa o 112 Galicia, a vítima entrou en parada cardiorrespiratoria e practicáronselle as manobras de reanimación sobre a area.

A Central de Atención ás Emerxencias de Galicia tivo constancia do suceso a través dun particular que se atopaba no areal de Viñó.

Neste operativo participaron Urxencias Sanitarias de Galicia-061, que desprazou ao lugar o seu helicóptero medicalizado con base en Santiago; a Garda Civil,  Protección Civil e a Policía Local de Cangas.