Investigan o afundimento dun bateeiro no Grove cargado con bidóns de combustible

A Garda Civil iniciou as pescudas para tratar de esclarecer as circunstancias que rodearon o afundimento dun bateeir) nas últimas horas fronte ao porto de Meloxo, no Grove.

Así, fontes da Comandancia confirmaron que se tomou declaración ás tres persoas, dúas delas veciñas de Rianxo e un cidadán estranxeiro, que se atopaban no barco e que foron rescatadas ao envorcar e afundirse a embarcación. As mesmas fontes matizaron que esas persoas non están detidas.

O barco estaba cargado con bidóns de combustible, que caeron ao mar cando se produciu o afundimento. De feito, os efectivos de emerxencias lograron rescatar 11 bidóns da auga (que en total sumaron 11.000 litro) e agora iniciáronse as primeiras dilixencias para aclarar o ocorrido e a actividade que estarían a realizar os tripulantes nese barco.

No punto onde se produciu o naufraxio, preto do faro das Pedras, atópanse a Salvamar Sargadelos, de Salvamento Marítimo, e a auxiliar do Mar de Galicia, de Gardacostas de Galicia, dependente da Conselleria do Mar.

Os efectivos actuantes neste operativo cren que hai outro bidón máis de gasoil que non se recuperou. Por iso, se a meteoroloxía o permite, a idea é que se mobilice un helicóptero para poder peitear o litoral.

A mediodía chegaron hoxe ao porto de Meloxo os Grupos de Especialistas en Actividades Subacuáticas (GEAS) da Garda Civil para inspeccionar o pecio do buque afundido.

O barco partiu do porto de Rianxo no mediodía da xornada do martes e a alerta polo incidente chegou a Emerxencias sobre as 18.30 horas da tarde deste martes. Foi un particular quen informou de que vira un barco envorcado xunto a unha batea, onde subiron as persoas que estaban a bordo. Pouco despois, efectivos do Servizo Municipal de Emerxencias confirmaron que a embarcación escorara mentres cargaba mercadorías e que acabou envorcando. Os tripulantes lograron pasar á batea sen sufrir danos persoais e o bateeiro terminou por afundir totalmente.

No operativo colaboraron Salvamento Marítimo, o Servizo de Gardacostas de Galicia, a Garda Civil, a Policía Local e o Servizo Municipal de Emerxencias do Grove.