Iago Aspas reapareceu cun gol diante do Atlético
Eran os primeiros minutos do de Moaña na Liga en 2025
Leva sete goles e consolídase como máximo goleador do Celta nesta temporada
Facíase esperar o regreso de Iago Aspas ao Celta. Despois da lesión sufrida na Copa diante do Rácing de Santander no primeiro partido de 2025 tardaba a estrea do de Moaña nun partido de Liga. Aspas non participaba desde o 14 de decembro no partido que o seu equipo perdeu no campo do Sevilla porque contra a Real Sociedade estivo no banco e non entrou.
No minuto 62 entrou no lugar de Fer López, e cando só levaba cinco minutos no terreo de xogo tomou a iniciativa para coller o coiro e pegar o penalti. É o sétimo gol de Iago Aspas no que levamos de campionato, dous por riba de Borja Iglesias malia ter xogado menos minutos que o Panda. Este ano lanzou catro penaltis e só fallou un, o primeiro que tirou diante do Valencia. Logo estivo infalible contra o Athlétic, o Español e este sábado no Metropolitano.
