Hunter Biden declárase non culpable de posesión ilegal dunha arma

Hunter Biden, fillo do presidente estadounidense Joe Biden, declarouse este martes non culpable dos cargos que se lle imputan por comprar unha pistola en 2018 e mentir ao afirmar que non consumía drogas, a pesar de que admitiu posteriormente que loitaba contra a súa adicción ao crack.

Esta foi a primeira comparecencia ante un xuíz de Hunter Biden desde que foi imputado o 14 de setembro de tres cargos pola compra e posesión ilegal de armas, que carrean unha pena máxima de 25 anos de cárcere. A sentenza, con todo, adoita ser menor para quen, como neste caso, carece de antecedentes penais.

Liberdade condicional

A súa comparecencia, de preto de media hora, produciuse na corte federal no centro da cidade de Wilmington (Delaware), que amenceu este martes rodeada de xornalistas, focos e cámaras de televisión, ademais dun forte dispositivo de seguridade. Dentro do edificio desenvolveuse unha breve vista xudicial en que o xuíz Christopher Burke se asegurou de que o fillo de Biden entendía os seus dereitos e os delitos de que é acusado para, a continuación, permitirlle que se declarase culpable ou non culpable.

Burke tamén leu a Biden as condicións baixo as que se lle concede a liberdade condicional mentres se desenvolve o xuízo, entre as que está permanecer baixo supervisión dun funcionario xudicial, buscar emprego de maneira activa, non posuír armas nin consumir drogas ou alcol.