Hugo González acumula méritos para quedar no primeiro equipo do Celta

Hugo González xa non é sub 23 co que non pode alternar o Fortuna co primeiro equipo do Celta. A única posibilidade de xogar no primeiro equipo é que Claudio aposte por el e lle faga ficha en Primeira División. O ano pasado marcou 18 tantos e resultou decisivo para o ascenso a Segunda División do filial. Na pretemporada leva dous goles en dous partidos e está a ser a arma ofensiva máis solvente do equipo vigués. 

Ao cuarto de hora do segundo tempo aproveitou un pase en profundidade de Iago Aspas para poñer o definitivo 1-0 que decidiu o amigable diante do Sporting de Xixón. Un partido que serviu para seguir rodando o plantel na terceira semana de traballo e para que volvese a vestir a camisola celeste o internacional sueco Carl Starfelt despois do seu paso polo Mundial e de non xogar un partido oficial co Celta desde mediados de marzo. 

A seguinte cita de preparación será diante do Académico de Visseu, partido que tamén se poderá seguir na Televisión de Galicia.