Hospitalizada en Ámsterdam unha azafata con posibles síntomas de hantavirus

Unha muller neerlandesa foi hospitalizada este xoves na capital de Países Baixos, Ámsterdam, para ser sometida a probas por un posible contaxio por hantavirus, segundo confirmaron as autoridades, despois de que medios locais indicasen que se trataba dunha azafata da aeroliña KLM.

"Podo confirmar que hai unha muller neerlandesa no hospital e que está sendo sometida a probas polo virus", declarou un voceiro do Ministerio de Sanidade dos Países Baixos.

A azafata, orixinaria da cidade de Haarlem, mostra síntomas leves e atópase internada e illada no centro médico UMC da capital holandesa, segundo dixo o Ministerio de Sanidade deste país á cadea estatal NOS.

Pouco antes, a cadea de televisión neerlandesa RTL informara do ingreso dunha azafata de KML por posible infección e agregou que tivera contacto coa muller neerlandesa falecida en Suráfrica a causa do hantavirus. Este reporte non foi confirmado por fontes oficiais. 

KLM confirmou o mércores nun comunicado que o Instituto Nacional Holandés de Saúde Pública e Medio Ambiente notificou á compañía que a muller que faleceu por hantavirus en Suráfrica estivo "brevemente" a bordo dun dos seus aparellos o pasado 25 de abril en Xohanesburgo.

"Por mor do estado de saúde da pasaxeira nese momento, a tripulación decidiu non permitirlle abordar o voo. Lamentablemente, a pasaxeira faleceu posteriormente en Johannesburgo", dixo, ao tempo que trasladou as súas condolencias aos seus familiares. 

"Como medida de precaución, o Servizo de Saúde Pública está a informar a todos os pasaxeiros que se atopaban a bordo deste voo. O Instituto Nacional de Saúde Pública e Medio Ambiente (RIVM) indica que existen indicios de que o hantavirus en cuestión (variante andina) pode transmitirse de persoa a persoa, pero que isto ocorre moi raramente", engadiu a aeroliña no escrito, onde tamén precisou que se trataba do voo KL592.

"A nivel internacional, só se describiron algúns casos. Ademais, a transmisión de persoa a persoa só se produce cando as persoas teñen un contacto moi próximo entre si", subliña o comunicado.

A muller holandesa falecida era a esposa do pasaxeiro que morreu a bordo do MV Hondius o 11 de abril, e considerado a primeira vítima mortal do gromo tras experimentar síntomas como febre, dor de cabeza e diarrea leve.

Ela desembarcou na illa de Santa Elena xa con síntomas e tomou un voo a Johannesburgo, pero morreu o 26 de abril nos servizos de emerxencia dun hospital desta cidade, tras tratar de tomar o citado voo a Ámsterdam.

O terceiro deceso ata a data foi o dunha segunda pasaxeira o 2 de maio tras presentar síntomas de pneumonía.