Coenen arrasa no GP de Finlandia, mentres Rubén Fernández suma un 6º e un abandono
O galego pelexou con Febvre ata a mesma liña de chegada polo 5º posto na primeira quenda
Na segunda tivo problemas e acabou abandonando, mentres Coenen volvía gañar e quedaba a 15 puntos de Febvre
Rubén Fernández rematou de décimo terceiro un Gran Premio de Finlandia no que estaba a acadar bos resultados, logo dun 4º na cualificación e un 6º na primeira quenda. Na segunda tivo que abandonar, sumando só 17 puntos no GP, que lle permiten manterse 4º no mundial.
Foi un GP redondo para Coenen. Xa desde a saída da 1ª quenda amosouse intratable. Non tardou en lograr unha diferenza suficiente para non pasar apuros en ningún momento. O belga gañou con trece segundos de vantaxe sobre o neerlandés Coldenhoff, quen foi o segundo. O podio completouno o italiano Andrea Bonacorsi.
O galego Rubén Fernández, quen rodou na cuarta posición durante moitas voltas, foi superado na parte final da carreira por Vlaanderen e polo líder do campionato, o francés Romain Fevbre, quen entrou quinto xusto por díante do piloto vigués, quen rematou de sexto.
Rubén Fernández tivo máis problemas na segunda manga. Logo dun problema na saída, cando marchaba no noveno posto, dende o seu box pedíronlle que baixara o ritmo e acabou por baixarse da moto, por abandonar a carreira mediada a proba. Aínda así, mantén o cuarto posto no Mundial grazas aos puntos acadados entre a cualificación e a primeira manga.
Esta segunda quenda volveuna gañar Lucas Coenen, achegándose a 15 puntos do líder Febvre na clasificación do Campionato do Mundo.
