Giráldez: "Isto é Europa, temos que subir o noso nivel"

Claudio Giráldez, adestrador do Celta, admitiu este xoves a “superioridade” do Stuttgart, e dixo que a derrota no debut europeo débelles servir “para saber onde estamos e para apertar”.

“O Stuttgart estivo moi ben, hai que darlle moito mérito ao que fixo o rival. Tivo un ritmo máis alto que o noso, xogou a unha velocidade moi alta e foi capaz de gañar moitos duelos”, manifestou.

“Isto é Europa, temos que subir o noso nivel porque necesitamos xogar a estas velocidades e a un nivel de precisión moito maior porque cada vez que saímos non conseguimos enganchar situacións de dúas para dúas ou tres para tres”, engadiu.

Giráldez lembrou que moitos dos seus xogadores estreábanse en Europa, aínda que non quixo poñelo como escusa porque “non” asinaron un bo partido en terras alemás.

“Ao final, co corazón, coa competitividade, coa unión que temos no vestiario, estivemos preto de empatar nesa situación de Bryan -Zaragoza-, pero a verdade é que eles son xustos vencedores”, incidiu o preparador do Celta.

Lamentou que o primeiro gol do rival chegase “nunha acción de xogo directo” do porteiro alemán e o segundo “nun balón parado que podemos defender moito mellor”.

“Son dúas accións moi evitables”, sostivo Giráldez, que aplaudiu o traballo dos seus xogadores “en bloque baixo” para conter o potencial ofensivo do Stuttgart