Ganomagoga presenta un ERE para máis de 200 traballadores
Ganomagoga presenta un ERE para máis de 200 traballadores
Os sindicatos piden mediación da Xunta para garantir a viabilidade da empresa
Foto: Ganamagoga.es
A empresa do sector metal Ganomagoga, con talleres nas localidades pontevedresas de Ponteareas e Mos, notificou este xoves o inicio do período de negociación dun expediente de regulación de emprego (ERE) extintivo para todo o persoal da compañía.
Esta medida da firma principal únese ás xa anunciadas noutras empresas do grupo, polo que en total supoñerá o despedimento colectivo de preto dunhas 200 persoas, segundo indican Comisións Obreiras e a Confederación Intersindical Galega en candanseu comunicado.
Por iso, os sindicatos solicitaron a mediación" da Xunta e o vindeiro mércores, 15 de marzo, celebrarase unha reunión bilateral coa Consellería de Economía, Industria e Innovación en San Lázaro.
CC. OO. e a CIG pediron á Administración autonómica que interveña para buscar unha solución e garantir a viabilidade da empresa e o mantemento do emprego.
Comisións Obreiras manifestou a súa "desconfianza" pola xestión empresarial, xa que a compañía alcanzou "máximos de produtividade" durante 2022 e rematou o exercicio do ano 2021 con grandes beneficios.
A CIG anunciou unha serie de protestas e pediu un encontro con responsables da Subdelegación do Goberno en Pontevedra para implicar ao máximo de institucións na defensa da empresa.
O Grupo Ganomagoga, opera en sectores como o naval, a eólica ou a biomasa e posúe centros de traballo en Ponteareas, O Porriño, Mos e Vigo.
