Galicia será pioneira co primeiro centro público de coidados intermedios do Estado
Galicia será pioneira co primeiro centro público de coidados intermedios do Estado
Destinarase á rehabilitación de maiores despois dunha estadía hospitalaria e antes de que poidan regresar aos seus domicilios
A Consellería de Política Social prevé que estea en funcionamento en Santiago no primeiro trimestre de 2024
As instalacións do Cegadi en Santiago, que foran residencia covid na pandemia, van acoller o primeiro centro de coidados intermedios de Galicia. Está pensado para os maiores que precisen coidados despois dunha estadía hospitalaria, e antes de regresar ao seu domicilio.
"Cando unha persoa maior ingresa cunha fractura de cadeira -explica a conselleira de Política Social, Fabiola García- unha vez que recibe a alta pode acudir a este centro de coidados intermedios para rehabilitación, terapia e coidados".
Destinaranse un millón de euros a adaptar as instalacións, e crear unha unidade de coidados intermedios para 60 residentes. Chegarán derivados dende o Servizo Galego de Saúde, e será Política Social a que se encargue de rehabilitalos e de darlles a alta.
Para Fabiola García, vai ser "unha ponte perfecta" entre o mundo sanitario e o social, que vai "repercutir directamente en mellorar a calidade de vida das persoas maiores".
A Xunta creará outro centro de coidados intermedios en Mos, con outras sesenta prazas previstas. A previsión é que este de Santiago poida estar xa en funcionamento no primeiro trimestre do ano que vén.
