Galicia mobiliza a súa mocidade católica para convidar a León XIV a vir o ano que vén
Os mozos súmanse á petición que o arcebispo de Santiago lle fixo ao papa
Queren que os acompañe nun tramo na Peregrinación Europea da Xuventude o vindeiro Ano Santo
Hai confianza en que o ano que vén o papa visite Santiago con motivo do Ano Santo. O convite oficial está feito dende o arcebispado pero agora é a mocidade galega a que quere sumarse á petición, saben que para o papa son a esperanza da fe cristiá.
"O papa tennos moito cariño aos mozos, xa o demostrou en distintas oracións, vixilias, misas", comenta Martín García, membro da Pastoral de Infancia e Xuventude de Santiago.
Con motivo da visita papal a España durante o mes de xuño 500 mozos católicos galegos van viaxar a Madrid para pedirlle que veña a Santiago o ano que vén. A loxística xa está preparada.
"Temos tres autobuses dende a delegación, un dende Santiago, outro dende A Coruña e outro dende Pontevedra, todos cheos de mocidade e con moitas ganas de ir", apunta Sara Carballeiro, que forma parte da Pastoral Xuvenil da diocese de Santiago.
O momento máis simbólico para trasladarlle o convite a León XIV será durante a gran vixilia que se celebrará a noite do 6 de xuño en que van participar 250.000 mozos de toda España.
"Porque as vixilias sempre son como o momento así de máis unión con toda a comunidade, con toda a mocidade, coa xente da túa idade que vaia estamos todos cara a un mesmo fin, que é ver o papa e sentir a Xesús entre nós", continúa Sara.
Moitos dos participantes nesta vixilia virán a Galicia o ano que ven para unirse á Peregrinación Europea da Xuventude. E queren que este papa camiñe a carón deles.
"A ver, dentro da posibilidade que ten porque penso que está moi ocupado, pero si, faríanos moita ilusión que poida camiñar con nós", conclúe Martín.
