Galicia lidera a reivindicación ante Bruxelas en contra da recentralización dos fondos

O presidente da Xunta, Alfonso Rueda, defendeu unha Unión Europea forte, cohesionada e próxima nas decisións á cidadanía:

"Que se escoite e que se respecte a voz dos territorios e que iso teña reflexo no novo marco financeiro plurianual ten que ser fundamental".

Unha posición que comparten o resto das comunidades e tamén os municipios españois á marxe da cor política. Luis Martínez, vicepresidente primeiro de Castela-A Mancha, pediu "máis fondos, máis transparencia, máis flexibilidade, manter a cohesión e non á recentralización".

Na mesma liña expresouse María Isabel Urrutia, conselleira de Presidencia de Cantabria:

"O peor que nos pode pasar como Unión é a recentralización dos fondos de cohesión", asegurou. 

Tamén compartiu a petición Inés Rey, alcaldesa da Coruña e vicepresidenta primeira da FEMP.

"Debemos trasladar á Unión Europa a descentralización administrativa que existe neste país", dixo. 

Os representantes autonómicos e municipais reuníronse en Santiago para impulsar a declaración Galicia. Un documento que Rueda agarda que o Goberno de Sánchez empregue na negociación coa Unión:

 "Espero que sexa tamén o documento do noso país ante a UE e que o noso goberno nacional entenda que recollendo o que nós pedimos está defendendo tamén unha posición de país", dixo o presidente da Xunta

A declaración Galicia tamén pide que non se recorten os cartos de Europa para a pesca e o campo.