Galicia achégase aos 70.000 casos activos tras sumar 8.600 contaxios
Hai cinco pacientes menos en planta e tres máis na UCI
O Sergas notifica a morte de dúas persoas nas últimas horas
Galicia continúa a bater marcas de casos activos. Nestes momentos, 69.717 persoas están infectadas na nosa comunidade. Son 4.936 máis ca este venres. Segundo informa o Sergas, rexistráronse 8.614 novos contaxios nas últimas 24 horas.
Se debullamos estes datos por áreas sanitarias, a de Vigo volve situarse á cabeza, con máis de 2.300 positivos nun día. A da Coruña supera os 1.600 e por riba do milleiro están as de Santiago e Pontevedra. As de Ferrol, Lugo e Ourense non chegan a esa cifra.
A tendencia ascendente, agás algún axuste estatístico, non se detivo desde o mes de decembro. Se comparamos a incidencia actual coa das vagas anteriores, podemos facernos unha idea da capacidade de contaxio que ten a variante ómicron.
Sen alcanzar aínda o pico desta sexta onda, xa se triplicaron os rexistros máximos de vagas anteriores. Iso si, constatouse un descenso do ritmo de propagación.
A presión hospitalaria nas distintas áreas sanitarias mantense en cifras similares: 539 (-2). Nas camas convencionais hai 483 pacientes coa covid, cinco menos ca na xornada anterior.
Porén, nas unidades de coidados intensivos ingresaron tres doentes máis, polo que o número de persoas en estado crítico ascende a 56.
Ocupación hospitalaria
Os episodios de maior tensión están a se producir nos centros de atención primaria, pero Galicia é a comunidade coa menor ocupación hospitalaria de España.
As persoas afectadas pola covid ocupan o 6 %, tanto en planta coma nas UCI. A media española é do 14 % nas unidades convencionais e do 23 % en coidados intensivos.
No que respecta á incidencia acumulada a dúas semanas, en Galicia medra a maior ritmo. Sitúase por riba dos 3.300 casos por 100.000 habitantes, cen puntos máis ca no conxunto do país.
Desde o inicio da pandemia contaxiáronse en Galicia 327.768 persoas, das que curaron 255.255, e faleceron 2.845, dúas nas últimas horas.
Un home de 77 anos morreu no Hospital de Verín e unha muller, de 82, no Complexo Hospitalario de Pontevedra, procedente da Residencia de Vilaboa. Segundo o Sergas, ambos os dous tiñan patoloxías previas.
