Fin de semana sen auga da traída na vila de Guitiriz

A veciñanza da vila de Guitiriz pasou a fin de semana sen auga da traída. Dúas avarías simultáneas deixaron o núcleo urbano sen subministración, unha na captación do encoro de San Xoán, que parou de funcionar, e outra na rúa Río Forxá, debido a unha fuga. 

O corte na subministración afectoulles a máis dun milleiro de residentes, tanto nos negocios coma nos seus fogares. De feito, a auga embotellada chegou a esgotarse, polo que houbo que ir collela ás fontes. 

Segundo o Concello de Guitiriz, a traída xa está practicamente recuperada na súa totalidade. Así e todo, segue en pé a recomendación de non consumir a primeira auga que saia da billa.