Ferido un home tras ser atropelado nun paso de peóns en Vigo

Un home resultou ferido na mañá deste venres tras ser atropelado por un vehículo cando cruzaba por un paso de peóns na zona de Coruxo, en Vigo. 

O accidente produciuse nunha das rotondas da Baixada ao Vao. Segundo informou o 112 Galicia, a vítima cruzaba con muletas por un paso de cebra cando foi alcanzada polo turismo e quedou tendida na calzada. 

Ata o lugar desprazáronse efectivos do 061 Galicia para atender o ferido. Nos primeiros momentos, varios veciños achegáronse para auxiliar o home ata a chegada dos servizos de emerxencias.