Ferido o condutor dun camión que envorcou en Vigo mentres transportaba area
Foi trasladado en ambulancia ao Álvaro Cunqueiro
Outro coche quedou danado ao caerlle enriba a carga do vehículo pesado
O condutor dun camión mancouse este xoves ao envorcar co vehículo no que transportaba area na parroquia de Valadares, en Vigo. Ao esparexerse a carga pola estrada, producíronse fortes retencións mentres duraban os labores de limpeza.
Ocorreu pouco antes das 08.30 horas á beira do Hospital Álvaro Cunqueiro, xunto á rotonda que conecta coa VG-20.
Varias persoas particulares alertaron o 112 Galicia para advertir que podía haber persoas atrapadas, polo que se solicitou a intervención de Urxencias Sanitarias-061, a Policía Local e os bombeiros. Con todo, ao chegaren os efectivos, confirmaron que o condutor estaba liberado.
O ferido tivo que ser trasladado nunha ambulancia ao Álvaro Cunqueiro, mentres que os servizos de intervención traballaron durante horas para retirar o camión e a area, que quedou esparexida pola estrada e provocou danos noutro coche.
📰 Accidente de camión en Vigo.
— 112 Galicia (@112Galicia) July 17, 2025
➡️ Transportaba terra e envorcou lateralmente na estrada de Clara Campoamor, Valadares.
➡️ Os medios traballan na limpeza da carga, que quedo esparexida pola vía.
🚨 Urxencias Sanitarias de Galicia-061, Bombeiros de Vigo e Policía Local. https://t.co/VpQLt58m8i
Dúas horas despois deste accidente, un motorista sufría unha caída noutra das rotondas de Valadares.
Varios particulares que chamaron ao 112 confirmaban que o condutor estaba consciente e tendido na calzada, polo que necesitaba asistencia médica.
Ata o lugar acudiron a Policía Local e unha dotación do 061, que trasladaron o ferido ata o Hospital Povisa.
