Feijóo propón un plan contra incendios que inclúe un rexistro nacional de pirómanos
Así o anunciou nunha conferencia de prensa onde presentou 50 medidas en total
Os anotados no rexistro terían que levar unha pulseira telemática de localización de maneira obrigatoria
O líder do PP, Alberto Núñez Feijóo, anunciou un plan de cincuenta medidas contra os incendios e para as zonas afectadas tras a onda que continúa activa. A máis destacada é a creación dun rexistro nacional de pirómanos.
Así o anunciou nunha conferencia de prensa en que fixo un esbozo do seu plan integral, que enviará ás Cortes, de axuda para a recuperación e prevención do mundo rural e forestal.
Neste rexistro, incluiríanse a tódalas persoas condenadas mediante sentenza firme que provocasen un incendio en España e implicaría utilizar pulseiras telemáticas de localización de maneira obrigatoria.
Iso, segundo Feijóo, chega logo de que o Goberno de Sánchez fallase na prevención de incendios e non puxese todos os medios dispoñibles para que a crise non collese a magnitude que ten. Tamén dixo que Sánchez non se puxo en contacto con el nestas semanas.
