Feijóo: "Estou convencido de que o PP sacaría maioría absoluta se houbese eleccións"
O líder dos populares recoñece nunha entrevista no diario El Mundo que se lle faltasen escanos pactaría con Vox
Considera que o acordo sobre o financiamento singular para Cataluña é unha situación absolutamente ilegal
Feijóo nun acto en Madrid esta semana. EFE / Juanjo Martín
O presidente do PP Alberto Núñez Feijóo afirma que o seu partido pactaría con Vox se non lograse a maioría absoluta nas vindeiras eleccións xerais.
"Se mañá houbese eleccións, estou convencido que o PP sacaría unha maioría absoluta. [...]. Se non conseguimos esa maioría absoluta porque nos faltan uns escanos, pois terei que pactar cousas con Vox", indicou Feijóo nunha entrevista que este domingo publica o diario El Mundo.
Preguntado sobre se habería que volver ás urnas no caso de que a formación de Santiago Abascal lle pedise entrar no Goberno, indicou que non cre que Vox sexa capaz de impedir unha investidura do PP, xa que en 2023 non propuxeron entrar no executivo e, ao seu xuízo, a situación política actual é de anormalidade democrática.
Respecto ao seu compromiso a non gobernar en coalición con este partido, Feijóo subliñou que o seu obxectivo é impulsar un Goberno do Partido Popular en solitario e cun cordón sanitario ao "partido da ETA".
"Comprométome a que os ministros sexan do PP porque o obxectivo é volver á normalidade política cun Goberno sólido e cun pacto que é o pacto que saia das urnas, o pacto dos votantes. O meu compromiso é conseguir 10 millóns de votos, e créoo factible", asegurou.
Ademais, Feijóo afirmou que para saber se a actual lexislatura chegará a 2027, as claves non son nin o presidente do executivo Pedro Sánchez nin os socios do Goberno, senón Víctor de Aldama e José Luis Ábalos.
Segundo dixo, aínda se coñece menos do 30 % da investigación da Unidade Central Operativa (UCO) da Garda Civil. Por iso, amosouse convencido de que vai ser moi determinante o que ocorra no outono.
En relación ao Pleno do Congreso celebrado o mércores pasado, o presidente do PP manifestou que, baixo o seu punto de vista, Sánchez non saíu reforzado.
"Vin uns socios moi incómodos, sen resposta para o seu electorado, e un presidente cativo do que sabe, do que fixo e do que permitiu facer", subliñou.
Preguntado sobre a postura que adoptará o seu partido este 14 de xuño, cando se prevé que se formalice o acordo entre o Goberno central e a Generalitat sobre o financiamento singular para Cataluña, Feijóo tachou a situación de absolutamente ilegal.
"O financiamento dunha comunidade autónoma non se pode aprobar de forma bilateral. Faremos o imposible para que os servizos públicos en España sexan iguais para todos os cidadáns do país", concluíu.
