Familias galegas de acollida piden axuda para rescatar os nenos ucraínos que xa atendían
Un pai de acollida galego está na fronteira polaca para traer a nena que pasa con eles todos os veráns
Solicita donativos cos que fretar autobuses para asistir a maior cantidade posible de familias ucraínas
"Viñemos aquí a Polonia na fronteira con Ucraína porque hai saídas inminentes tanto de Érika coma dos nenos dos arredores, fuxindo da guerra esta".
Samuel Vázquez é pai de acollida e membro dunha ONG que todos os veráns acolle en Galicia unha nena ucraína na súa casa, dentro dos programas de axuda á infancia dese país que se veñen realizando dende a traxedia nuclear de Chernobil.
Coa invasión militar rusa non o pensou, e dende onte está na fronteira polaca, esperando a chegada dun autobús procedente de Ucraína no que a pequena Érika tenta fuxir da guerra xunto con outros nenos e familiares.
"Os nenos están tardando como unhas vinte e catro horas en chegar dende o centro de Ucraína ata a fronteira porque o bus ten que ir coa luz apagada xa que lles poden disparar", afirma.
Este pai de acollida asegura que a situación na fronteira é sobrecolledora, cos albergues rebordados de nenos e nais ucraínos que buscan refuxio, e sen máis asistencia que a das autoridades locais. Por iso pide axuda.
"Desde a asociación estamos pedindo esa achega económica para fretar autobuses, gasolina para movernos e fundamentalmente para sacar os nenos de Ucraína cara a España", solicita.
A asociación "Infancia de Nad" ten unha páxina en Internet ( ongINFANCIAdeNAD.org) onde está aberta unha conta bancaria na que facer achegas económicas: ES86 2100 2808 5501 0068 4718. Rescatar da barbarie militar os máis vulnerables e acabar canto antes coa irracionalidade da guerra son agora as prioridades.
