Falece unha mariscadora en Porto do Son tras ser arrastrada por un golpe de mar
Pescadores que se atopaban pola zona conseguiron sacala da auga e trasladala nunha planadora a porto para que recibise asistencia médica, pero a muller, de 54 anos, xa falecera
Unha percebeira que traballaba na extracción do molusco entre o Castro de Baroña e o Farito, en Porto do Son, faleceu na mañá deste martes por un golpe de mar.
Segundo informou o CIAE 112 Galicia, o suceso tivo lugar minutos antes das dez da mañá. A vítima, de 54 anos, era unha percebeira experimentada, igual que o seu home. Os primeiros en avistar o seu corpo na auga foron uns bateeiros que estaban en terra apañando mexilla. Estes avisaron o patrón maior da confraría de Porto do Son, que andaba pola zona. "Fixéronnos acenos cos brazos, en sinal que de que pasara algo", comentounos Emilio Queiruga
Malia a rapidez coa que reaccionaron, chegaron demasiado tarde. Moitos dos recursos activados para o seu rescate foron, finalmente, anulados, xa que nada podía facerse para salvarlle a vida.
Con todo, os xestores do Centro Integrado de Atención ás Emerxencias de Galicia informaron a todos os organismos competentes, como Salvamento Marítimo, Servizo de Gardacostas de Galicia, Garda Civil, Policía Local e Urxencias Sanitarias de Galicia-061.
"O meu fillo botouse á auga e logramos subila a bordo. Fíxenlle o boca a boca, pero non reaccionou. Desde o 112 insistiron en que seguise coas manobras, e así o fixen, pero non puidemos reanimala. Quédame unha sensación de impotencia", concluía o patrón maior.
O cadáver da muller foi trasladado ata o porto, onde os sanitarios do 061 certificaron o seu falecemento. Ata o lugar tamén se trasladou o xuíz, que finalmente ordenou o levantamento do corpo.
