Morre unha nena de dous anos en Brión tras esquecela o pai no interior do coche
O proxenitor levou o maior ao colexio e esqueceuse de deixar a nena na gardería tras recibir unha chamada cando pasaba por diante do seu centro de traballo
A cativa chegou ao PAC de Bertamiráns en parada cardiorrespiratoria
O Concello decreta dous días de loito e convoca un minuto de silencio para o mediodía deste venres
Traxedia no concello coruñés de Brión. Unha nena de 2 anos e medio morreu no interior do coche do seu pai. O pai esqueceu deixala na gardería e a meniña pasou moitas horas e a altas temperaturas no interior do vehículo.
O proxenitor levou o maior ao colexio e esqueceuse de deixar a nena na gardería tras recibir unha chamada cando pasaba por diante do seu centro de traballo. O home, ao recibir a chamada, estacionou o vehículo e acudiu ao seu traballo sen decatarse de que non deixara a meniña na gardería.
Cando a nai foi recoller a nena a gardería decatáronse do suceso e trasladaron a menor ao PAC de Bertamiráns, onde explicaron que deixaran esquecida a menor.
As altas temperaturas rexistradas en Galicia, a deshidratación e as horas transcorridas no vehículo foron determinantes, polo que aínda que a menor foi conducida ao próximo punto de atención continuada de Bertamiráns en parada cardiorrespiratoria, alí finalmente faleceu.
O Concello de Brión declarou dous días de loito oficial pola morte da nena e convocou un minuto de silencio en sinal de pesar. En declaracións aos medios este xoves, o alcalde da localidade, Pablo Lago, trasladou o seu "profundo pesar" polo suceso e chamou os veciños a participar no minuto de silencio que terá lugar o venres ás 12:00 horas diante do consistorio.
"Este é un concello pequeno, onde case nos coñecemos todos e esta noticia colleunos a todos a contra pé, é un día moi triste para nós", manifestou o alcalde, que asegurou que coñece persoalmente á familia e pediu non "afondar máis" no que pasou.
"Podíanos pasar a calquera, andamos todos a correr e sempre contra o reloxo e estas cousas para que pasen tense que dar un cúmulo de circunstancias moi grande pero, por desgraza, pasan", manifestou.
A familia vive encima do negocio en que traballa o proxenitor. En 2023 no Porriño faleceu tamén un neno de dous anos por un golpe de calor cando a súa nai deixoullo esquecido no coche, en lugar de levalo á gardería, e foi traballar.
