Falece un rapaz en Madrid ao tomar unha bebida enerxética na que botaran cocaína rosa

Un mozo de 14 anos faleceu por intoxicación en Xetafe despois de inxerir unha lata dunha bebida enerxética na que botaran uns dous gramos da coñecida como 'cocaína rosa' ou 'tusi', unha mestura de substancias como a ketamina ou a éxtase.

O sucedido investígase como posible delito de homicidio.

O asunto poñerase en mans do fiscal de menores, quen tomará declaración ás persoas involucradas no caso unha vez sexan identificadas e decidirá sobre as investigacións para realizar.

A familia desmente de forma categórica que o menor consumise drogas "nin ese día nin ningún".

De feito, aseguran que hai un vídeo en Instagram, xa borrado, no que os mozos supostamente relacionados co caso se mofaban do que consideran "unha fazaña".

Os feitos producíronse sobre as once da noite do pasado venres en Xetafe cando o mozo e dous amigos quedaron con outros mozos que coñeceran na rede social de Instagram.  

Ao parecer, estes rapaces botáronlle dous gramos de 'tusi' nunha lata sen que o menor e os seus amigos se decatasen.

Tras iso, os descoñecidos fuxiron polo metro e colgaron un vídeo nas redes sociais contando a súa "fazaña" e mofándose do menor.

Aos minutos, o mozo caeu en redondo e sufriu unha parada cardiorrespiratoria, sen que se o puidesen reanimar.