Detido un home en Valencia acusado de matar a puñaladas o logopeda do seu fillo
Fontes xornalísticas sinalan que o arrestado sospeitaba que a vítima abusaba do menor
O presunto homicida pasará este mércores á disposición xudicial
EFE/Raquel Segura
Nos calabozos da Policía Nacional de Burjassot, en Valencia, permanece detido un home de 24 anos acusado de matar este luns no barrio de Marxalenes, en València, a outro de 32, por causas que se están investigando.
O suceso tivo lugar sobre as 18:15 horas nunha clínica en València, onde o detido supostamente matou a outro home tras asestarlle varias coiteladas.
Segundo publican algúns medios de comunicación, o móbil do crime podería ser uns presuntos abusos sexuais. Ao parecer, a vítima era un logopeda que estaba a atender o seu fillo e o arrestado entendeu que estaba a abusar sexualmente do menor e acabou coa súa vida.
Os axentes do Grupo de Homicidios da Brigada Provincial de Policía Xudicial e de Policía Científica de Valencia desprazáronse ao lugar. Ao chegar, confirmaron o falecemento da vítima e fixéronse cargo das pescudas. Estase á espera dos resultados da autopsia practicada á vítima.
O presunto autor do crime podería pasar mañá á disposición xudicial.
