Falece un mozo de 27 anos nun accidente de tráfico en Sandiás
Outros dous implicados resultaron feridos, un deles grave, e foron atendidos polos profesionais sanitarios
O accidente tivo lugar ás 4:29 horas deste venres no punto quilométrico 4 da OU-531 á altura do concello ourensán de Sandiás. O coche saíu da vía pola marxe dereita nun tramo en curvo e acabou envorcado nunha leira. O condutor do Audi TT era un veciño de Xinzo de Limia de 27 anos, que faleceu. Outros dous implicados resultaron feridos, un deles grave, e foron atendidos polos profesionais sanitarios.
De inmediato, os xestores do Centro Integrado de Atención ás Emerxencias puxeron os feitos en coñecemento de Urxencias Sanitarias de Galicia-061, da Garda Civil de Tráfico, dos Bombeiros de Xinzo e dos servizos de mantemento da estrada. Tamén se informou o Grupo de Intervención Psicolóxica en Catástrofes e Emerxencias (GIPCE), do Colexio Oficial de Psicoloxía de Galicia, por se fose necesaria a súa intervención.
Os bombeiros rastrexaron as proximidades do vehículo, ante uns indicios que apuntaban a que podía haber un cuarto ocupante, mais finalmente non atoparon ninguén na zona.
