Falece un turista madrileño na praia da Rapadoira, en Foz, tras ser rescatado da auga
O home estaba inconsciente cando foi trasladado á area onde lle realizaron manobras de reanimación que lamentablemente non tiveron éxito
É o segundo falecido nas praias da Mariña no que vai de verán
Un home faleceu este mércores á noitiña na Praia da Rapadoira, en Foz, tras ser rescatado do mar inconsciente.
O 112 Galicia recibía a alerta ás 21:20 horas, cando varios particulares chamaban para informar de que unha persoa estaba flotando inconsciente na auga e de que algúns bañistas estaban meténdose no mar para tratar de rescatalo. A esa hora xa non había socorristas no areal, e o mar estes días anda revolto.
De contado, o Centro Integrado de Atención ás Emerxencias 112 Galicia informou ao Servizo de Urxencias Sanitarias de Galicia-061, a Salvamento Marítimo, á Garda Civil, á Policía Local e aos membros de Protección Civil da localidade.
"Había unha persoa inconsciente, varios usuarios sacárona da auga e trataron de reanimala, os servizos de emerxencia seguiron coa reanimación pero xa non puideron facer nada por ela", explica Bábara Ramos, membro de Protección Civil.
O falecido é un veciño de Madrid, de 67 anos, que pasaba o verán na localidade mariñá xunto á súa muller, que o agardaba na area.
Neste caso non parece que houbera unha imprudencia, e todo apunta a que o home puido sufrir unha indisposición na auga.
"Estaba cerca do espigón, que é unha zona máis perigosa, pero pasaríalle o mesmo noutra zona da praia", engade Bárbara Ramos.
Este é o segundo afogamento que se rexistra nas praias da Mariña no que vai de verán.
