Falece un home de 88 anos en Láncara tras esnafrarse contra un sinal mentres conducía
A Garda civil non desbota que sufrira unha indisposición
A acompañante saíu ilesa
Un condutor de 88 anos de idade faleceu este martes tras sufrir un accidente de circulación no municipio lucense de Láncara.
Segundo a información facilitada polo Subsector de Tráfico da Garda Civil de Lugo, o sinistro produciuse na estrada autonómica LU-546, que comunica Nadela (Lugo) con Monforte, concretamente á altura do quilómetro 12,200.
Ás 08:40 horas, o coche que conducía o falecido saíu da vía pola marxe esquerda da calzada e chocou contra un sinal vertical, xusto antes de chegar a unha rotonda.
De feito, o coche chegou a realizar a rotonda e detívose na beiravía da marxe dereita da calzada, a uns cen metros da glorieta.
Á espera dos resultados da autopsia, a Garda Civil non desbota que falecera por motivos naturais.
A vítima, de 88 anos, era do municipio de Sarria. A acompañante do condutor falecido quedou ilesa.
