Falece un home ao ser atropelado por un turismo en Vilaboa
O accidente produciuse nunha zona do Toural, na N-554
Un home perdeu a vida este mércores tras ser atropelado por un turismo na estrada N-554, ao seu paso pola localidade pontevedresa de Vilaboa.
Segundo informou o 112 Galicia, o accidente produciuse sobre as 15.30 horas nunha zona do Toural. En concreto, fronte á oficina do Banco Santander.
#AXEGAInforma dun atropelo mortal
— 112 Galicia (@112Galicia) May 21, 2025
📍N554, O Toural, #Vilaboa
▶️Un turismo alcanzou a vítima e, malia os intentos dos profesionais sanitarios, nada puideron facer por salvarlle a vida.
🚨Urxencias Sanitarias de Galicia-061, @guardiacivil de Tráfico, Protección Civil pic.twitter.com/YcHsBvxJL3
O aviso sobre este accidente recibiuse no 112 Galicia a través dos axentes da Policía Local de Vigo, que, casualmente, estaban pola zona no momento do sinistro. Indicaron que a persoa estaba ferida e necesitaba asistencia médica urxente, aínda que estaba liberada e accesible.
Deste xeito, solicitouse a intervención de Urxencias Sanitarias de Galicia-061 e dos axentes da Garda Civil de Tráfico. Pouco despois, eran, precisamente, os efectivos de seguridade quen confirmaban o falecemento da persoa e o bo estado dos ocupantes do vehículo, que, neste caso, eran tres.
Tamén acudiron ao momento membros de Protección Civil da localidade, que demandaron que se utilizasen alternativas a esta vía para evitar retencións e facilitar o paso aos vehículos prioritarios.
