Falece o xornalista Pepe Seijo, histórica figura da radio lucense

O xornalista da Cadena SER Pepe Seijo, unha das voces máis recoñecidas da radio en Lugo, faleceu este luns de forma repentina mentres se atopaba traballando na emisora.

Pepe Seijo, tamén colaborador de El País, tiña 57 anos e unha dilatada traxectoria profesional vinculada ao espazo radiofónico. Durante anos exerceu, ademais, como correspondente de Europa Press na provincia lucense.

Naceu en Bilbao e pasou a súa infancia en Euskadi. Seguidor apaixonado do Athletic de Bilbao, como se recoñecía o mesmo en calquera conversa, chegou a ser presidente da súa peña lucense.

Décadas de traballo ligado ás ondas servíronlle para converterse nunha voz de referencia na provincia, que perdeu no principio do ano a outro dos seus xornalistas radiofónicos máis coñecido: Arcadio Silvosa.

Despois de transcender o seu falecemento, as redes sociais acumulan condolencias de compañeiros de traballo, dirixentes políticos e institucións e organizacións.

Entre as condolencias, a Deputación de Lugo transmitiu o seu "agarimo e máis profundo afecto" a familiares, amigos e compañeiros do xornalista. "Hoxe foise unha voz que marcou a historia do xornalismo lucense. Unha gran persoa e xornalista. Ata sempre Pepe, que a terra che sexa leve, como ti dicías", transmite.

Tamén o exministro José Blanco lembra a Seijo no seu perfil de Twitter: "Síntoo moitísimo. Bo profesional e mellor amigo". Pola súa banda, o secretario xeral do PSdeG, Valentín González Formoso, traslada a súa tristeza pola noticia do falecemento de "a gran voz da radio" en Lugo.

E desde o Club Deportivo Lugo transmitiron o seu "profundo" pesar pola morte dun xornalista que "permanecerá na memoria de todos para sempre".

CC OO enviou un comunicado ás redaccións galegas no que lamenta o falecemento do xornalista, que foi delegado do sindicato durante máis de 20 anos.