Falece no Gran Sol un tripulante do pesqueiro Novo Alborada ao caer á auga
O corpo foi recuperado e trasládano arestora cara o porto de Vigo
Imaxe de arquivo
Un tripulante do pesqueiro vigués Novo Alborada faleceu tras caer á auga cando pescaban a 165 millas das illas Sorlingas, no caladoiro do Gran Sol.
Trátase dun mariñeiro ghanés de 52 anos que no momento do accidente traballaba na popa do arrastreiro.
Segundo informou Salvamento Marítimo, o corpo do pescador falecido foi recuperado da auga este mércores e atópase a bordo do pesqueiro no que traballaba.
O barco arrastreiro , pertencente á armadora José Cesáreo, diríxese agora a Vigo, onde ten o seu porto base.
Tras coñecerse a noticia, o delegado do Goberno en Galicia, José Miñones, trasladou o seu pesar pola morte deste traballador e púxose disposición da armadora para prestar "todo o apoio necesario".
Hombre al agua desde el pesquero Novo Alborada 165 millas SE de islas Sorlingas (UK). CNCS Informa a @HMCoastguard Se movilizan buques en zona y un mercante con el propio pesquero recuperan al pescador ya fallecido. Pesquero se dirige a Vigo con el cadáver #SeguridadNautica pic.twitter.com/lRbNxYW9gQ
— SALVAMENTO MARÍTIMO (@salvamentogob) February 15, 2023
O Centro de Coordinación de Salvamento en Fisterra tivo a primeira noticia ás 5:44 da pasada madrugada, cando recibiu vía satélite o aviso de que un home caera á auga.
Posteriormente, Salvamento Marítimo alertou as autoridades británicas, xa que o buque galego se atopaba en augas de salvamento daquel país.
Ambas entidades contactaron con tres barcos que estaban na zona: o 'Brisas Pituxinas', o 'Canto Novo' e o 'Santa Viola'.
Finalmente, o náufrago foi avistado polos seus compañeiros de tripulación e recuperado da auga por un mercante, un dos buques que se mobilizaron tras o suceso, e o propio pesqueiro.
O 'Novo Alborada' partira rumbo ao Gran Sol o pasado luns 13 de febreiro desde o porto de Marín).
Agárdase que este venres chegue ao porto de Vigo.
