Falece en Badaxoz o escritor Domingo Frades, estudoso da fala extremeña

O escritor Domingo Frades Gaspar, destacado defensor e estudoso da fala estremeña, faleceu este mércores en Badaxoz.

Así o confirmou nun comunicado a Real Academia Galega (RAG), da que era membro desde 2004.

Nacido en San Martiño de Trebello (Cáceres), foi falante nativo da variedade mañega e, tal e como destaca a academia, realizou un "importane labor" de recompilación de vocabulario, toponimia, costumes e cantigas populares, á vez que fomentou o coñecemento das falas da zona.

Ademais, además de ser axente de extensión agraria do Ministerio de Agricultura de profesión, colaborou na constitución de diversas entidades culturais, entre elas a Asociación Fala i Cultura do Val do Río Ellas, da que foi presidente, e organizou eventos como o Congresu da Fala en Valverde do Fresno (Cáceres), entre outros.  

Domingo Frades Gaspar foi escritor de varias obras sobre a cultura e a lingua da Serra de Gata, entre elas as monografías Vamus a falal. Notas pâ coñecel e platical en nosa fala (1992 e 2000) e Callejeiru mañegu.

Tamén publicou a tradución do Novu Testamentu en fala en 2015.

En canto á poesía, precisamente uns días antes da súa morte chegara ás súas mans Obra poética mañega, unha recompilación dos poemas que foi publicando entre 1971 e 2004.

O volume será presentado de forma póstuma o próximo 20 de xaneiro en Badaxoz, o 21 en San Martín de Trebello e o 22 en Valverde do Fresno.  

Como académico correspondente da RAG, Frades Gaspar leu o discurso "Por que estó contentu de falar", xunto aos tamén membros Carlos Xesús Varela Aenlle, Héctor Silveiro e Felipe Lubián, nun acto dedicado ao mañego celebrado na sede da academia, na Coruña, o 18 de decembro de 2004.