Falece Antolín Alcántara, histórico sindicalista da CIG e referente das "loitas" do metal e do naval
Falece Antolín Alcántara, histórico sindicalista da CIG e referente das "loitas" do metal e do naval
Alcántara iniciou a súa militancia sindical ben novo, cando empezou a traballar no sector da automoción, e converteuse nunha das figuras salientables do sindicalismo nacionalista galego
A CIG destacou que a defensa da clase traballadora, da xustiza social e da "liberación nacional e social de Galicia" convertéronse nos eixes da súa vida, e que estivo especialmente ligado ás "loitas" nos sectores do metal e do naval
O histórico sindicalista da Confederación Intersindical Galega (CIG) Antolín Alcántara Álvarez faleceu na madrugada deste xoves, e será despedido cun acto este venres ás 12:30 horas no tanatorio de Pereiró en Vigo. Natural de Moaña, Alcántara iniciou a súa militancia sindical ben novo, cando empezou a traballar no sector da automoción, tras unha etapa como maquinista naval, e converteuse nunha das figuras salientables do sindicalismo nacionalista galego.
A CIG destacou que a defensa da clase traballadora, da xustiza social e da "liberación nacional e social de Galicia" convertéronse nos eixes da súa vida, e que estivo especialmente ligado ás "loitas" nos sectores do metal e do naval, onde destacou o seu papel nas mobilizacións de 2007 e 2009.
Ao longo da súa traxectoria desempeñou diversas responsabilidades na CIG, e en 2005 foi elixido secretario confederal de Negociación Colectiva e Saúde Laboral, na candidatura de Suso Seixo.
"Unha voz clara e valente na denuncia das reformas laborais, das políticas antisociais e da perda de dereitos da clase traballadora (...) Pero por encima de todo Antolín foi un compañeiro profundamente humano, solidario e comprometido con todas as causas xustas", destacaron desde a central nacionalista.
Así, a CIG puxo en valor as súas "fortes conviccións" e a súa "honestidade", mesmo "nos momentos máis difíciles", como cando foi procesado e condenado por desordes en Vigo durante os conflitos do metal.
O ano pasado, Antolín Alcántara publicou o libro 'En memoria da nosa infancia', no que reconstrúe a dureza dos anos da súa infancia e mocidade, e reivindica valores como a solidariedade, o apoio mutuo ou a conciencia colectiva.
"Coa morte de Antolín Alcántara desaparece un compañeiro imprescindible para entender a historia recente da CIG e das loitas obreiras e nacionalistas de Galicia. Pero o seu exemplo de coherencia e compromiso quedará para sempre na memoria colectiva do sindicalistamo nacionalista galego e de todas as persoas que compartiron con el a defensa dunha sociedade sen explotación, máis xusta e plenamente libre", trasladou a Confederación Intersindical Galega.
