Expulsado un neno de 10 anos dun colexio de Ourense por unha suposta agresión sexual a unha nena de 5

Un alumno de 5º de Educación Primaria do CEIP As Mercedes, en Ourense, foi expulsado de forma preventiva tras unha suposta agresión sexual a unha alumna de Infantil, de apenas 5 anos.

Os feitos terían lugar no interior do centro escolar, pero fora do horario lectivo e nun momento sen supervisión directa.

Segundo a versión da nena, o menor conduciuna aos baños do centro e, unha vez alí, produciuse un episodio que foi cualificado como presunta agresión de índole sexual.

A situación foi posta en coñecemento da Fiscalía de Menores, que abriu dilixencias informativas para determinar o ocorrido.

O CEIP As Mercedes ten xornada continua ata as 14:00 horas. Desde ese momento, ata o inicio de actividades extraescolares, ao redor das 16:00 horas, os alumnos permanecen no centro baixo a tutela do ANPA, que se encarga da xestión do comedor.

O asunto tivo lugar durante este intervalo de tempo, segundo informan fontes da Consellería de Educación.O caso foi abordado coa "maior velocidade", tras o aviso inmediato da dirección do centro á Consellería, e activáronse os protocolos establecidos.

"Ante unha presunta conduta que pode ser grave, o centro abre un expediente e, en función da gravidade, adopta medidas respecto diso", engade Educación.

Arquivo das dilixencias

Aínda que nun inicio a Fiscalía Provincial de Ourense abrira dilixencias por este caso, tivéronse que arquivar ao constatar que o alumno "non ten 14 anos" e, por tanto, non chega á idade mínima para poder ter responsabilidade penal.

Segundo explican fontes do Ministerio Público, iniciouse un "expediente de protección" con respecto do suposto autor para que a Xunta valore "se debe ser obxecto da adopción dalgunha medida", que pode ser educativa, terapéutica ou de atención social, que teña como obxectivo "o benestar e desenvolvemento do menor".