España mantén o seu rexeitamento a máis gasto militar a pesar das presións de Trump e a OTAN

España converteuse en protagonista do cumio da OTAN que se celebra na Haia debido ao seu rexeitamento a aumentar o gasto militar ao 5 % do PIB que reclaman a Alianza e o presidente dos Estados Unidos Donald Trump, porque o Goberno de Pedro Sánchez segue convencido de que cun 2,1 % pode cumprir os seus compromisos.

O rexeitamento deixouno patente Sánchez na carta que enviou o pasado venres ao secretario xeral da OTAN Mark Rutte, que propiciou acelerar as negociacións e chegar a un acordo que anunciou o xefe do Executivo asegurando que España terá flexibilidade con ese gasto.

Por tanto, destinará a cumprir os seus compromisos o 2,1 %, nin máis, nin menos, como dixo Sánchez, pero desde ese anuncio sucedéronse declaracións do propio Rutte e de Trump que aumentaron a presión para que haxa un gasto maior.

O Goberno español afirma que resistirá porque conta coa garantía da carta do secretario xeral da OTAN na que ven o aval a esa flexibilidade no gasto. Rutte advertiu este luns de que a Alianza considera que España terá que chegar ao 3,5 % para cumprir eses compromisos, pero o Executivo de Sánchez considérao unha mera opinión e asegura que o tempo demostrará que co 2,1 % do PIB é suficiente.

Ao mesmo argumento de opinión persoal e para evitar o choque directo botou man o Goberno ante as críticas a España que verteu Trump cando viaxaba camiño da Haia no Air Force One. "Hai un problema con España. España non está de acordo, o cal é moi inxusto para o resto", sinalou en referencia a esa negativa de España a incrementar o gasto militar ata o 5 % do PIB.

Pero o presidente estadounidense seguiu tendo a España no punto de mira ao compartir despois na súa rede social un gráfico co titular "España ameaza con descarrilar o cumio da OTAN" e no que reivindicou o incrible gasto dos Estados Unidos en defensa.

Con eses antecedentes, Sánchez e Trump coincidirán este mércores no cumio da OTAN, pero xa o fixeron a pasada noite, xa que acudiron á cea ofrecida polos reis dos Países Baixos aos líderes participantes no encontro da Alianza.

O presidente estadounidense foi o último en chegar, e a continuación houbo unha foto de familia na que, de acordo con o protocolo fixado, ambos estiveron afastados, mentres que na cea posterior estiveron en mesas distintas.

Non hai ningún encontro previsto entre ambos durante o cumio, e as posicións de cada un quedarán reflectidas nas súas respectivas intervencións no plenario desta cita dos xefes de Estado e de Goberno da Alianza. Á espera diso, Rutte admitiu que sospeita que nese plenario aumemente a presión sobre España para que incremente o seu gasto en defensa.

Pero mostrouse convencido de que España subscribirá a declaración final e se manterá a unidade, algo que o Goberno de Sánchez comparte plenamente porque vincula a firma desa declaración co acordo que di conseguir para manter a súa soberanía á hora de decidir o gasto necesario para cumprir coa OTAN. Un acordo que Sánchez está seguro de que é bo tanto para España como para a OTAN. 

O secretario xeral da OTAN Mark Rutte asegurou este mércores que non está preocupado sobre un eventual fracaso do cumio pola negativa de España a subir o gasto en defensa ao 5 % do PIB, e admitiu que entende que son decisións difíciles e cada país ten que atopar o diñeiro.