España impón controis fronteirizos aos viaxeiros procedentes de Italia tralo choque con Meloni
Os controis comezaron a aplicarse en aeroportos e portos dende esta medianoite
O Goberno de Pedro Sánchez adopta a medida trala negativa de Georgia Meloni a levantar as barreiras que impuxo pola crise migratoria de Ceuta
Pedro Sánchez e Giorgia Meloni. Fernando Calvo/Europa Press (Arquivo)
España restableceu esta medianoite controis aleatorios nos aeroportos e portos para os viaxeiros procedentes de Italia, en resposta ás restricións impostas por Roma aos pasaxeiros que chegan desde España.
Os controis estarán vixentes, inicialmente, ata o 7 de setembro e incluirán a comprobación da identidade e nacionalidade dos viaxeiros e, no caso de cidadáns extracomunitarios, dos visados e permisos de residencia.
O Goberno español adoptou esta medida despois de que o Executivo de Giorgia Meloni rexeitase retirar os controis fronteirizos impostos a España pola crise migratoria de Ceuta. Roma anunciou que non revisará a decisión, polo menos ata o 15 de agosto, e asegura que non acepta ultimátums sobre a súa seguridade nacional e o control das fronteiras.
Pola súa banda, Madrid considera inxustificadas as medidas italianas e lembra que os migrantes que entraron irregularmente en Ceuta non poden acceder libremente ao espazo Schengen. Segundo o Ministerio do Interior, unhas 72.000 persoas entraron de forma irregular na cidade autónoma a semana pasada, das que arredor de 70.000 xa foron devoltas a Marrocos.
A crise entre ambos países agrávase así cun intercambio de medidas que afecta a dous socios do espazo Schengen e que pode ter impacto nun intenso fluxo turístico: máis de once millóns de pasaxeiros viaxaron entre España e Italia en avión ata xuño deste ano.
