Técnicos de Facenda preguntan por que Zapatero non cedeu as xoias ao Estado
Sosteñen que ten explicar como acabou no seu patrimonio persoal un obsequio que lle entregaron pola súa condición de presidente do Goberno
Gestha engade que se a documentación acredita que foron recibidas en 2007, a investigación penal relacionada co Imposto sobre Sucesións estaría prescrita
Os Técnicos do Ministerio de Facenda (Gestha) consideran que o expresidente José Luis Rodríguez Zapatero debe explicar cal foi o destino das xoias que, segundo trasladou ao xuíz, recibiu como obsequio do entón rei de Arabia Saudita e por que acabaron formando parte do seu patrimonio particular.
Nun comunicado difundido este mércores, Gestha sostén que, se as xoias lle foron entregadas na súa condición de presidente do Goberno, no marco das relacións internacionais e en representación de España, Rodríguez Zapatero debe explicar por que non as cedeu ao patrimonio do Estado.
Os Técnicos de Facenda lembran que en 2005, durante o seu mandato, aprobouse un Código de Bo goberno que establecía criterios sobre os agasallos recibidos polos membros do Goberno e contemplaba que os obsequios de "maior significación de carácter institucional" puidesen incorporarse ao patrimonio do Estado.
Gestha engade que, se a documentación que achega Zapatero acredita que as xoias foron un agasallo recibido en 2007, a investigación penal relacionada co Imposto sobre Sucesións e Doazóns estaría afectada pola prescrición.
Tamén lembra que a tenza das xoias pode ter incidencia no Imposto sobre o Patrimonio se non foron declaradas. Neste punto, os técnicos consideran no entanto moi improbable que poida existir un delito fiscal vinculado ao Imposto sobre o Patrimonio.
Así, explican que para alcanzar o limiar penal de 120.000 euros de cota presuntamente defraudada, o valor das xoias tería que superar os 3,4 millóns de euros e o patrimonio individual, unha vez descontadas as débedas, os 10,7 millóns de euros, segundo os supostos manexados por Gestha.
