España elimina a Xibraltar da súa lista de paraísos fiscais

O Ministerio de Facenda puxo en audiencia e información pública unha orde ministerial que saca a Xibraltar da lista de "xurisdicións non cooperativas" en materia fiscal. O borrador de orde ministerial tamén establece a saída da mencionada lista de Barbados, Dominica, Samoa, Seychelles e Trinidad e Tobago.

Pola contra, engádese a Rusia á relación de xurisdicións que teñen a consideración de non cooperativas, polo que respecta ao réxime fiscal prexudicial.

O texto inclúe que a orde entrará en vigor ao día seguinte da súa publicación no Boletín oficial del Estado (BOE) e que será de aplicación aos tributos devindicados a partir da súa entrada en vigor e aos demais tributos cuxo período impositivo se inicie desde ese momento. 

 O Goberno de Xibraltar valorou a publicación da orde que retiraría formalmente a Xibraltar da lista española de paraísos fiscais, unha designación que mantiña desde 1991. Nunhas declaracións difundidas este xoves nun comunicado de prensa, o ministro principal de Xibraltar, Fabián Picardo, afirmou que esta medida é "un paso longamente esperado e moi benvido".

"Durante 35 anos, Xibraltar cargou coa etiqueta de paraíso fiscal. Esa etiqueta era inxusta. Érao cando se aplicou por primeira vez en 1991 e fíxose cada vez máis difícil de xustificar a medida que desenvolviamos un dos centros financeiros máis transparentes e mellor regulados do mundo. España iniciou agora o proceso para corrixir o relato", agregou.

A saída de Xibraltar da lista de paraísos fiscais chega cando queda menos de dous meses para a retirada da reixa, prevista para o 15 de xullo e que dará cumprimento ao acordo asinado o 11 de xuño de 2025 entre a Unión Europea e o Reino Unido sobre Xibraltar e o seu status tras o brexit. Na práctica supón a libre circulación de persoas e mercadorías entre o territorio británico e España eliminando os controis de entrada e saida. A derruba da reixa será a imaxe máis visible da supresión da fronteira física.